Аматарскае аб'яднанне "Белавежская цявінка" было створана ў 1997 годзе з мэтай адраджэння i прапаганды мясцовых народных звычаяў, традыцый. У складзе аб'яднання 24 аматары мясцовага фальклору i нацыянальнай культуры. Дзеці з задавальненнем выступаюць з абрадамі, дзе добра перадаюць настрой гэтых свят, шукаюць, запісваюць, развучваюць песні і танцы сваёй мясцовасці, вывучаюць гісторыю беларускай фалькларыстыкі, цікава i разумна праводзяць свой вольны час. У цяперашні час састаў аб'яднання налічвае 24 удзельніка, якія дзеляцца на дзве групы - асноўную (14—17 гадоў) i падрыхтоўчую (6 - 12 гадоў), а таксама аркестр. Вучэбна-выхаваўчая работа будуецца на аснове глыбокага вывучэння народнай творчасці i аналізу ўласнага фальклорнага матэрыялу. Неаднойчы дзеці наведвалі бліжэйшыя вёскі: Расну, Міневічы, Чапялі, Баршчэва, Мікалаева з мэтай пазнаёміцца з мясцовымі інтанацыямі гутарковай мовы, даведацца пра абрады, касцюмы, гульні, танцы, пачуць жывое выкананне народных песень. Дзеці запісалі на магнітафонную ленту багацейшы матэрыял мясцовага фальклору. Удзельнікі аб'яднання маюць сапраўдныя вясковыя касцюмы, зробленыя рукамі бабуль, якія адпавядаюць камянецкаму строю. Такім чынам сувязь паміж пакаленнямі не рвецца, не забываецца даўніна i гэтаму садзейнічае дзіцячае ўзорнае фальклорнае аматарскае аб'яднанне "Белавежская цявінка". Калектыў за апошнія тры гады прымаў удзел у абласным фальклорным фестывалі "Радавод-2” (2006г., дыплом лаўрэата), у абласной навукова-практычнай канферэнцыі "Традыцыйная культура і дзеці” (2007 г., дыплом першай ступені), у змене "Осенний бал” Нацыянальнага дзіцячага аздараўленчага лагера "Зубраня” (2007 г., дыплом за актыўную дзейнасць), у абласным фестывалі аркестравых калектываў, фальклорных груп (2008 г., дыплом лаўрэата), у раённым фальклорным свяце "Спадчына” (2009 г., грамата за пераемнасць і развіццё народных традыцый). "Белавежская цявінка” выступала з тэматычнай праграмай на раённай нарадзе настаўнікаў; на раённым свяце лясных працаўнікоў вёскі Камянюкі; у Рэзідэнцыі беларускага Дзеда Мароза; у вёсках раёна. Калектыў прымаў удзел у фальклорных фестывалях у Польшчы. У паселку Белавежскі традыцыйнымі сталі выступленні на мерапрыемствах, прысвечаных Дню Перамогі, Дню працаўніка сельскай гаспадаркі, Дню настаўніка i інш. Не абыходзіцца без "Белавежскай цявінкі" i правядзенне народных свят - "Купалле", "Калядкі", "Дажынкі. Такі напрамак у рабоце аб'яднання забяспечвае пераемнасць i самабытную форму выканання песень, танцаў, народных абрадавых дзеянняў. Выступленні юных фалькларыстаў заўсёды карыстаюцца нязменным поспехам у гледачоў. Калектыў укамплектаваны касцюмамі i мае памяшканне для заняткаў i пасяджэнняў, знаходзіцца ў стане творчага пошуку, працягвае і захоўвае традыцыі мясцовага фальклору.
